İyulun 30-da Azərbaycan Gömrük Təmsilçiliyi və Logistika Şirkətlərinin Assosiasiyasının (AGTL) ofisində “SR Logistics and Transport” MMC-nin rəhbərliyi ilə görüş keçirilib. Görüşün əsas məqsədi şirkətin Assosiasiyaya üzvlük müraciətinin dəyərləndirilməsi və qarşılıqlı əməkdaşlıq imkanlarının müzakirəsi olub.
Görüşü AGTL-in nümayəndəsi açaraq Assosiasiyanın yaranma tarixi, fəaliyyət istiqamətləri və üzvlük strukturu barədə ətraflı məlumat verib. O bildirib ki, Assosiasiya logistika və gömrük təmsilçiliyi sahəsində fəaliyyət göstərən şirkətləri bir araya gətirməklə sektoral inkişafı dəstəkləyir və təcrübə mübadiləsinə töhfə verir.
“SR Logistics and Transport” MMC-nin icraçı direktoru Rəşad Əliyev, logistika üzrə menecer İlkin Hüseynov və gömrük əməliyyatları üzrə menecer Arzu Şirinov görüşdə iştirak edərək şirkətin fəaliyyəti barədə məlumat veriblər. Bildirilib ki, 2024-cü ildə yaradılan “SR Logistics and Transport” MMC müasir logistika yanaşmalarına əsaslanan xidmətlər təqdim edir. Şirkət beynəlxalq və yerli daşımaların təşkili, gömrük rəsmiləşdirilməsi və daşıma proseslərinin optimizasiyası üzrə ixtisaslaşıb. Nümayəndələr qeyd ediblər ki, məqsəd etibarlı, çevik və innovativ logistika həlləri təqdim etməklə yerli və regiona lbazarda dayanıqlı mövqe qazanmaqdır.
Görüş zamanı Assosiasiyanın təqdim etdiyi imkanlar, üzvlüklə bağlı prosedurlar və gələcək əməkdaşlıq yolları ətrafında geniş fikir mübadiləsi aparılıb.