Azərbaycan Gömrük Təmsilçiliyi və Logistika Şirkətlərinin Assosiasiyası (AGTL), “Azərbaycan Dəmir Yolları” QSC və “Uniser Group” şirkətinin birgə təşkilatçılığı ilə Bakı KOB Evində “Dəmiryol yük daşımalarında son trendlər: yüklərin izlənməsi üzrə yeni platforma – GLLOC” mövzusunda təqdimat keçirilib.
AGTL tərəfindən bildirilib ki, logistika sahəsində rəqəmsal həllərin tətbiqi yükdaşımaların effektivliyini artırır və sahibkarlar üçün yeni imkanlar yaradır. “Azərbaycan Dəmir Yolları” QSC nümayəndələri isə dəmir yolu sahəsində rəqəmsallaşmanın üstünlüklərini diqqətə çatdırıblar. “Uniser Group” şirkəti GLLOC platformasının texniki imkanları və sahibkarlara təqdim etdiyi xidmətlər barədə məlumat verib.
"GLLOC" platforması istifadəçilərə sifariş kodu ilə axtarış, vaqon və stansiyalar haqqında məlumat, yük kodları üzrə sorğu, vaqonların təmir statusunun izlənməsi, eləcə də konteynerlərin axtarışı kimi funksiyalar təqdim edir.
Hazırda platforma Özbəkistan, Qazaxıstan, Türkmənistan, Tacikistan, Qırğızıstan, Moldova, Latviya, Estoniya, Gürcüstan, Monqolustan, Ukrayna və Çin daxil olmaqla bir sıra ölkələri əhatə edir. Bu isə yüklərin vahid sistem üzərindən izlənməsinə, tranzit daşımaların rəqabət qabiliyyətinin artırılmasına və region ölkələri arasında logistika əlaqələrinin möhkəmlənməsinə imkan yaradacaq.
Tədbirdə sahibkarların təklifləri dinlənilib və vurğulanıb ki, GLLOC-un tətbiqi Azərbaycanın tranzit potensialının güclənməsinə mühüm töhfə verəcək.
Tədbirin sonunda G2B və B2B xarakterli sual-cavab sessiyası ilə baş tutmuş və sahibkarların sualları cavablandırılmışdır.
