İyulun 29-da Azərbaycan Gömrük Təmsilçiliyi və Logistika Şirkətlərinin Assosiasiyası ilə üzvlüyə müraciət etmiş “UTEMLOGISTICS” MMC-nin rəhbərliyi arasında görüş keçirilib.
Görüşü Assosiasiyanın sədri Vüsal Qasımov açaraq qurumun fəaliyyət istiqamətləri, məqsədləri və üzv şirkətlər üçün təqdim olunan imkanlar barədə geniş məlumat verib. O, Assosiasiyanın özəl sektorun inkişafına dəstək göstərmək və logistika sahəsində koordinasiyanı gücləndirmək istiqamətində fəaliyyəti barədə danışıb.
“UTEMLOGISTICS” şirkətinin Polşa nümayəndəliyinin rəhbəri Ülvi Musayev çıxışı zamanı bildirib: “Şirkətimiz Polşada təsis olunub və uzunmüddətli beynəlxalq daşımalar təcrübəsinə malikdir. 2022-ci ildən etibarən Azərbaycan filialımız fəaliyyət göstərir və biz Avropa, Azərbaycan və Qazaxıstan arasında effektiv logistika həlləri təqdim edirik.”
Şirkətin Azərbaycan üzrə nümayəndəsi Təbriz Məmmədov yerli bazarda həyata keçirilən fəaliyyət və xidmət sahələri haqqında məlumat verib.
Görüşdə tərəflər arasında qarşılıqlı əməkdaşlıq imkanları, sektor üzrə çağırışlar və üzvlük perspektivləri ətrafında fikir mübadiləsi aparılıb. Danışıqlar gələcək tərəfdaşlıq üçün mühüm zəmin yaradıb.